د میرویس خان نیکه پوهنتون لپاره نوی رئیس معرفي شو
د میرویس خان نیکه پوهنتون لپاره نوی رئیس معرفي شو.
نن شنبه د عالیقدر أمیرالمؤمنین حفظه الله د حکم په اساس مفتي عزیزالله طیب صاحب د میرویس خان نیکه پوهنتون لپاره د نوي رئیس په حیث مقرر او د یوې غونډې په ترڅ کې رسما معرفي شو.
یاده غونډه په داسې حال کې ترسره شوه، چې پرمهال یې د زابل ولایت مقام د دفتر رئیس مولوي قدرت الله بدري، د پوهنتون نوي رئیس مفتي عزیز الله طیب، د پوهنتون مخکني رئیس مفتي وقایت الله وقار، د ولایت مقام د کارکوونکو چارو آمر مولوي احمد مختار، د علماوو شورا غړو، د پوهنتون اداري او کادري غړیو ګډون درلود.
غونډه چې د قرآن کریم په تلاوت سره پیل شوه، د ښه راغلاست او پیلیزه وینا یې د علمي او محصلانو چارو مرستیال وکړه، نوموړي نوي رئیس او د غونډې ګډونوالو ته ښه راغلاست ووایو او هم یې د مخکیني رئیس څخه د خوښې او خدای پاماني مراتب وړاندې کړل.
ورپسې د پوهنتون مخکیني رئیس مفتي وقایت الله وقار صاحب وینا وړاندې کړه، نوموړي وویل: له اسلامي نظام سره زموږ تړون د موقف په خاطر نه بلکې د الله ﷻ د رضا په خاطر دی، هر مسؤلیت چې راته سپارل کیږي ورته لبیک وایو، نه له چا ګیله کوو او نه په چا د مسؤلیت احسان اچوو، همدارنګه نوموړي د خبرو په دوام؛ د پوهنتون له ټول کاري ټېم څخه غوښتنه وکړه، چې د پوهنتون په ټولو چارو کې د نوي رئیس اطاعت وکړي او خپل مسؤولیتونه دي په پوره اخلاص، ژمنتیا او پر وخت ترسره کړي، په پای کې يې د پوهنتون له ټول کاري ټيم څخه ځانګړې مننه وکړه، چې له نوموړي سره یې د مسوولیت په دوره کې ښه همغږي، همکاري او اخلاص کړی دی.
د پوهنتون نوي رئیس محترم مفتي عزیزالله طیب صاحب د غونډي ګډونوالو ته د وینا پر مهال وویل: چې دوه نیم کاله مو د علماوو شورا د رئیس په حیث مسؤلیت کړی دی او په میرویس خان نیکه پوهنتون کې به هم خپل مسؤلیت د پوهنتون له منسوبینو سره په مشورو مخته وړو، نوموړي په وروستۍ برخه کې وویل: د پوهنتون له ټول کاري ټيم څخه مو غوښتنه ده چې په یووالي، اخلاص او ژمنتیا سره زموږ پوره ملاتړ وکړي.
د معرفت غونډې په وروستۍ برخه کې د ولایت مقام د دفتر رئیس مولوي قدرت الله بدري صاحب وینا وکړه، نوموړي د پوهنتون د مخکيني رئيس د مسؤلیت او لاسته راوړنو ستاینه وکړه او د نوی رئیس په معرفت یې خوښي څرګنده کړه.
وروسته د معرفت غونډه په دعا سره پای ته ورسېده.
نېټه:شنبه1405/1/22
د نشراتو او عامه پوهاوي عمومي مدیریت
