د چاپېریال ساتنې اړوند سمینار وړاندي شو
د میرویس خان نیکه زابل د لوړو زده کړو مؤسسې د ښوونې او روزنې پوهنځي رئیس پوهنیار طاوس خان هیوادمل او د فزیک څانګې آمر ښاغلي ګلالرحمن احساس له لوري یو مهم او ارزښتناک سمینار د چاپېریال ساتنې اړوند د مؤسسې و محصلینو ته وړاندي شو، د دغه سمینار موخه د ځوان نسل د چاپېریالي پوهاوي لوړول وو.
په سمینار کې د ځنګلونو ارزښت، د اوبو د سرچینو ساتنه، او د پاکې هوا د اهمیت په اړه هر اړخیز معلومات وړاندې شول وړاندي کوونکو ټینګار وکړ چې د طبیعت سره مینه او د چاپېریال ساتنه نه یوازې د اسلامي او انساني مسؤولیت یوه برخه ده، بلکې د سالمې راتلونکې لپاره یوه حیاتي اړتیا هم ده، دوی زیاته کړه، چې د اقلیم بدلون، د طبیعي منابعو کمښت، او د هوا ککړتیا هغه خطرونه دي چې باید ځوانان یې په اړه پوره پوهه ولري.
محصلینو د دې سمینار په اخیستلو سره د چاپېریال ساتنې په برخه کې د مسؤلیت احساس څرګند کړ او ژمنه یې وکړه چې د خپلو ټولنو په کچه به د طبیعي منابعو د ساتنې او پراخوالي لپاره اغېزمن رول ولوبوي.
