د محصلینو له نماینده ګانو سره د همغږۍ غونډه ترسره شوه.

د محصلینو له نماینده ګانو سره د همغږۍ غونډه ترسره شوه.
نن ورځ چهار شنبه چې د ۱۴۰۴/۵/۲۹ نیټې سره برابره ده، د میرویس خان نیکه زابل پوهنتون د علمي او محصلانو چارو معاونیت، د محصلینو د خدمتونو او همغږۍ عمومي مدیر الحاج مولوي مطیع الله مجاهد د ټولو ټولګیو محصلینو له نماینده ګانو سره د همغږۍ غونډه ترسره کړه.
لومړی غونډه د قرآن کریم په تلاوت سره پیل او ورپسې د محصلینو د خدمتونو او همغږۍ نوموړي مدیر پیلیزه وینا وړاندې کړه، نوموړي په خپله وینا کې وویل: دا چې پوهنتون ته نوي محصلین راغلي دي نو له هغوی سره دې په مختلفو برخو کې پوره همکاري وشي ترڅو د پوهنتون له محیط او تحصیلي چارو سره بلدتیا پیداکړي.
همدارنګه نوموړي د وینا په پای کې یادونه وکړه چې زموږ ټولنه یوه اسلامي ټولنه ده او زموږ لپاره لومړیتوب د معنویاتو تقویت دی، په همدې اساس کوشش وکړئ چې صورت او سیرت مو په شریعت برابر شي.
د غونډې په ورستۍ برخه کې د محصلینو نظرونه او غوښتني واورېدل شوې او یاده غونډه د دعا په ویلو سره پای ته ورسېده.
د نشراتو، اړیکو او عامه پوهاوي مدیریت.