د زابل ولایت ۱۴۰۳ هــ ش کال د کانکور ازموینه پېل شوه
نن پنج شنبه، د میرویس خان نیکه زابل د لوړو زده کړو مؤسسې د غونډو په عمومي تالار کې، د زابل ولایت ۱۴۰۳ هــ ش کال د کانکور ازموینه په داسي حال کې پېل شوه، چې په مهال یې د ازموینې ملي ادارې څخه راغلی هیئت، د میرویس خان نیکه زابل د لوړو زده کړو مؤسسې رهبري، استادانو او د کانکور ګډونوالو شتون درلود.
د ازموینې د پېل مراسم د مولوي عبدالصمد سیال صاحب له لوري د قرانکریم د مبارکو آیاتونو په تلاوت سره پېل شول، ورپسې د میرویس خان نیکه زابل د لوړو زده کړو مؤسسې د علمي او محصلانو چارو مرستیال مولوي بهاؤالحق عزام په خپله وینا کې د ازموینې ملي اداري څخه راغلي ټیم ته د ښه راغلاست ووایه او د ځوان پر اهمیت یې خبرې وکړې او هم یې شاګردانو ته د انتخاب په برخه کې پر ښه دقت بیان وکړ.
دغه راز د ازموینې ملي ادارې څخه یو تن ګډونوال پوهمنل نقیب الله خان د مؤسسې د رهبري له مېلمه پالنې او همکارۍ څخه مننه وکړه او ویې ویل: د شیخ مولوي عبدالباقي حق.ا. ني صاحب په راتګ سره د کانکور ازموینو کې زیات پرمختګونه شوي دي. د کانکور و ګډونوالو ته یې د یادې ازموینې پر اهمیت او د خپلې خوښي پوهنځیو ته د بریالی کیدو هیله وښوده. خانخیل د کانکور و ګډونوالو ته د ازموینې پر شفافیت او پروسه باندې په تفصیل سره خبرو تر څنګ وویل: د کانکور ازموینه چې د افغانستان د ازموینې ملي اداري چې د افغانستان په سطحه یو شفافه اداره ده؛ له لوري د افغانستان په ټولو ولایتونو کې په بیلابیلو وختونو اخیستل کیږي.
د مراسمو په پای کې د ټولو ګډونوالو و مخته د سوالاتو صندوق چې د ازموینې ملي ادارې څخه مُهر او لاک را وړل شوی خلاص شو او وروسته یاد مراسم د دعا په ویلو سره پای ته ورسېدل.
